ភ្នំពេញ៖ ដំណើរការបោះឆ្នោតជ្រើសរើសតំណាងរាស្ត្រ នីតិកាលទី៧ ឆ្នាំ ២០២៣ នៅព្រឹកនេះ កំពុងប្រព្រឹត្តទៅដោយរលូន សេរី ត្រឹមត្រូវ និងយុត្តិធម៌ មិនមានការបង្ខិតបង្ខំ តាមគោលការណ៍នៃលទ្ធិប្រជាធិបតេយ្យ ដោយមានពលរដ្ឋជាច្រើនបានទៅចូលរួមបោះឆ្នោត ខណៈក៏មានពលរដ្ឋមួយចំនួន បានគូសខ្វែងចោលសន្លឹកឆ្នោត ឬធ្វើឲ្យខូចសន្លឹកឆ្នោត ហើយបង្ហោះនៅលើបណ្ដាញសង្គម។

មន្រ្តីជាន់ខ្ពស់ក្រសួងយុត្តិធម៌ លោក គឹម សន្ដិភាព បានឱ្យដឹងរយៈសារលើបណ្តាញសង្គមលោកនៅថ្ងៃទី២៣ ខែក្កដា ឆ្នាំ២០២៣ ថា កម្លាំងសមត្ថកិច្ចកំពុងស្រាវជ្រាវប្រមូលភស្ដុតាងចំពោះបុគ្គលដែលបានប្រព្រឹត្តសកម្មភាពខុសច្បាប់ គូសខ្វែងចោលលើសន្លឹកឆ្នោត ឬធ្វើឲ្យខូចសន្លឹកឆ្នោតនេះ ដើម្បីយកមកចាត់វិធានការតាមច្បាប់ ដោយគ្មានការលើកលែង។

សារលោកមានខ្លឹមសារថា៖«សមត្ថកិច្ច កំពុងអង្កេតស្រាវជ្រាវប្រមូលភស្តុតាងចំពោះបុគ្គលណាដែលថតផ្សាយអំពីការគូសខ្វែងចោលលើសន្លឹកឆ្នោត ឬធ្វើឲ្យខូចសន្លឹកឆ្នោត ឬបំផុសឲ្យអ្នកដទៃប្រព្រឹត្តអំពើបំពានច្បាប់នេះ ក្នុងបណ្តាញសង្គមនានា ដើម្បីចាត់វិធានច្បាប់ ដោយគ្មានការលើកលែង»។

គួរឱ្យដឹងដែរថា ពលរដ្ឋចំនួន ៩ ៧១០ ៦៥៥នាក់ ក្នុងនោះស្រី ៥ ១៦១ ៩០៩នាក់ ដែលមានឈ្មោះក្នុងបញ្ជីបោះឆ្នោតដែលមានសិទ្ធិទៅបោះឆ្នោតថ្នាក់ជាតិ ក្នុងការិយាល័យបោះឆ្នោតសរុបចំនួន ២៣ ៧៨៩។ គិតត្រឹមម៉ោង១១:០២ ព្រឹកនេះប្រជាពលរដ្ឋកម្ពុជាអញ្ជើញទៅបោះឆ្នោតមានចំនួន ៤ ៧១៤ ០៧៤នាក់៕